وزیراعظم سے آصف زرداری اور بلاول بھٹو کی ملاقات، ملکی سیاسی صورتحال پر تبادلہ خیال

اسلام آباد (ڈیلی گرین گوادر) وزیراعظم شہباز شریف سے آصف زرداری اور بلاول بھٹو نے ملاقات کی جس میں ایم کیو ایم کے تحفظات دور کرنے کے حوالے سے بات چیت کی گئی۔وزیر اعظم شہباز شریف سے پاکستان پیپلز پارٹی پارلیمنٹیرین کے صدر آصف علی زرداری اور پاکستان پیپلز پارٹی کے چیئرمین و وزیر خارجہ بلاول بھٹو زرداری نے اسلام آباد میں ملاقات کی۔

ملاقات میں وزیر داخلہ رانا ثناء اللہ، وزیرِ اقتصادی امور سردار ایاز صادق، وزیرِ ریلوے و ہوابازی خواجہ سعد رفیق اور رہنما مسلم لیگ ن ملک احمد خان بھی موجود تھے۔ ملاقات میں موجودہ ملکی سیاسی صورتحال پر تبادلہ خیال کیا گیا۔ ذرائع کا کہنا ہے کہ ملاقات میں وزیراعظم نے ایم کیو ایم سے کیے گئے معاہدے کے حوالے سے پیپلز پارٹی سے تبادلہ خیال کیا۔قبل ازیں ایم کیو ایم نے وزیراعظم سے شکوہ کیا تھا کہ پیپلز پارٹی ان سے کیے گئے معاہدے پر عمل درآمد نہیں کررہی۔