بلوچستان میں بجلی کا مسئلہ بحرانی صورت اختیار کر رہا ہے،وزیراعلئ بلوچستان

کوئٹہ (ڈیلی گرین گوادر) وزیراعلئ بلوچستان میر عبدالقدوس بزنجو نے کہا ہے کہ بلوچستان میں بجلی کا مسئلہ بحرانی صورت اختیار کر رہا ہے، زمیندار اور عام آدمی بجلی کی عدم دستیابی کی وجہ سے شدید مشکلات کا شکار ہے۔وزیراعلی بلوچستان عبدالقدوس بزنجو نے زمینداروں کے وفد سے ملاقات کے دوران کہا کہ اس صورت کو مزید برداشت نہیں کیا جاسکتا، کیسکو اور وفاقی حکومت کو بلوچستان کی بجلی کے مسلئہ کے حل کے لیۓ ہنگامی بنیادوں پر اقدامات کرنے ہونگے۔

وفد نے وزیراعلئ کو آگاہ کیا کہ طویل دورانیہ کی لوڈ شیڈنگ کی وجہ سے انکی فصلیں تباہ ہو رہی ہیں اور انکا روزگار بری طرح متاثر ہو رہاہے اس کے باوجود کہ زمیندار بل باقاعدگی سے ادا کر رہے ہیں۔اس موقع پر سی ای او کیسکو نے آگاہ کیا کہ بجلی کی تقسیم و ترسیل کے مرکزی سسٹم سے بلوچستان کو اس کے کوٹے کی پوری بجلی فراہم نہیں کی جارہی انہوں نے بتایا کہ اس وقت بلوچستان کو 500 میگا واٹ بجلی دی جارہی ہے جبکہ کم سے کم ضرورت 800 میگا واٹ ہے۔

وزیراعلیٰ نے کہا کہ وہ اس حوالے سے وفاقی وزیر توانائی سے بات کر کے احتجاج ریکارڈ کرائیں گے تاکہ بلوچستان کے عوام ساتھ زیادتی نہ ہو اور صوبے کو اس کے کوٹے کے مطابق بجلی کی فراہمی یقینی ہو۔