پنجاب اسمبلی اجلاس بلانے کیلئے جو تماشا لگا وہ سارا پاکستان دیکھ رہا ہے، حمزہ شہباز

لاہور (ڈیلی گرین گوادر) اپوزیشن لیڈر پنجاب اسمبلی حمزہ شہباز کا کہنا ہے کہ تحریک انصاف نے ملک کو بنانا رپبلک بنا کر رکھ دیا، پنجاب اسمبلی کا اجلاس بلانے کے حوالے سے جو تماشا لگایا جا رہا ہے وہ سارا پاکستان دیکھ رہا ہے۔

پنجاب اسمبلی اجلاس کی غیر یقینی صورتحال پر حمزہ شہباز شریف نے بیان دیتے ہوئے کہا کہ آئین و قانون کی دھجیاں اڑانے والوں کو اپنے اقدامات کے نتائج کا بخوبی پتا ہونا چاہئے، ڈپٹی سپیکر پنجاب اسمبلی کے احکامات کو بھی نہیں مانا جا رہا،تحریک انصاف اور پرویز الہی کا گٹھ جوڑ اوچھے ہتھکنڈوں پر اتر آیا ہے۔

حمزہ شہباز کا کہنا تھا کہ پنجاب کے منتخب نمائندوں کا حق ہے کہ وہ اپنا قائد ایوان منتخب کریں، منتخب نمائندوں کے حق پر پہلے وفاق میں ڈاکا ڈالا گیا اب پنجاب میں کارروائی کی تیاری ہے، کسی بھی غیر آئینی، چور دروازے اور دھونس پر مبنی اقدام سے باز رہا جائے۔