ینگ ڈاکٹرز ایسوسی ایشن کا اپنے مطالبات کے حل کیلئے ریڈ زون کے باہردھرنا
کوئٹہ(ڈیلی گرین گوادر) ینگ ڈاکٹرز ایسوسی ایشن نے اپنے مطالبات کے حل کیلئے ریڈ زون کے باہر دھرنا دیدیا،دھرنے کے باعث شہر میں ٹریفک کی روانی میں خلل پڑا۔تفصیلات کے مطابق جمعرات کی شام اچانک ینگ ڈاکٹرز ایسوسی ایشن نے اپنے مطالبات کے حل کیلئے سول ہسپتال کوئٹہ سے ایک احتجاجی ریلی نکالی جو انسکمب روڈ سے ہوتی ہوئی ریڈ زون پہنچی ینگ ڈاکٹرز نے ریڈ زون کے باہر احتجاجی دھرنا دیدیا جس کی وجہ سے زرغون روڈ پر ٹریفک معطل ہوگئی اور شہر میں ٹریفک کی روانی میں خلل پڑا۔ ینگ ڈاکٹرزایسوسی ایشن کے ذرائع نے بتایا کہ ینگ ڈاکٹرز ایسوسی ایشن گزشتہ کئی ماہ سرکاری ہسپتالوں میں سہولیات کی فراہمی اور اپنے جائز مطالبات کے حل کیلئے احتجاج پر ہے حکومت کی جانب سے مذاکرات کے باوجود مسائل کے حل کا نوٹیفکیشن جاری نہیں کیا جارہا ہے۔ذرائع نے بتایا کہ مسائل کے حل ہونے تک ریڈ زون کے باہر دھرنا جاری رہے گا۔
٭٭٭٭٭٭٭
