ہماری قربانیاں ہمیشہ صوبہ اور ملک کے عوام کے لئے رہی ہیں،نواب ثناء اللہ خان زہری

خضدار(گرین گوادر نیوز)سابق وزیراعلیٰ بلوچستان چیف آف جھالاوان نواب ثناء اللہ خان زہری نے کہاہے کہ آنے والے مستقبل میں ہمارے ورکرز مضبوط سیاسی پوزیشن میں ہونگے ماضی میں سب سے بڑھ کر بلوچستان کے عوام کی سیاسی و قبائلی نمائندگی اور صوبے کے دیرینہ مسائل کو کم کرنے کی کوشش کی،تعلیم صحت کی صورت میں بڑے پراجیکٹس دیئے اضلاع اور شہروں کی تعمیرو ترقی اور خوبصورت کے لئے کام کیا آئندہ اس سے بڑھ کر بہتر فارمولاپیش کریں گے بلوچستان کے سیاسی داؤ پیج سے بخوبی آگاہ ہیں بہت سارے سیاسی رہنماء اور قبائلی عمائدین نے سیاسی حوالے سے مل کر آگے بڑھنے کے لئے رابطہ کیا ہے ان تمام سیاسی و قبائلی عمائدین کو اپنے قافلے میں خوش آمدید کہیں گے، نجی مصروفیات کے باعث کچھ وقت کے لئے کارکنوں سے دور رہا تاہم اب بہت جلد ان کے درمیان رہ کرمستقبل کی سیاسی حکمت عملی مرتب کریں گے۔سابق وزیراعلیٰ بلوچستان نواب ثناء اللہ خان زہری کا کہنا تھاکہ ہماری قربانیاں ہمیشہ صوبہ اور ملک کے عوام کے لئے رہی ہیں مضبوط وفاق اور ملکی سالمیت کے لئے کسی بھی قربانی سے دریغ نہیں کیا ہے میرے خاندان سمیت میرے ورکرز نے دیر پا امن کے لئے قربانیاں دی ہیں ہماری جدوجہد اور کوششوں کے باعث آج صوبے میں امن قائم ہے اور لوگ پہلے کی بنسبت سکون کے ساتھ رہ رہے ہیں۔انہوں نے کہاکہ ہماری سیاسی تربیت میں دوغلی پالیسی قطعاً شامل نہیں ہے ہمیشہ اپنے عوام کے ساتھ سچ کے ساتھ گفتگو کی اور سیاست میں ان کے لئے اچھے راستے کو چنا ان کی خوشحالی و فلاح وبہبود کے لئے ہمیشہ غور و فکر کیا اوربڑے پیمانے کے منصوبے تشکیل دیئے۔ آج میں اور میرے ورکرز یہ بات فخر اور اعزاز کے ساتھ کہہ سکتے ہیں کہ ہم نے صوبے کو امن و خوشحالی دینے میں کامیاب ہوئے۔یونیورسٹیز اور کالجز دیئے یہ تاریخ کا حصہ ہیں جسے کوئی بھی رد نہیں کرسکتا ہے۔ سابق وزیراعلیٰ بلوچستان نواب ثناء اللہ خان زہری نے مولہ میں سیاسی و قبائلی عمائدین کو اپنے سیاسی قافلے میں شمولیت پر خوش آمدید کہا اور کہاکہ ہمارے قافلے میں مذید سیاسی ورکرز شامل ہونگے۔انشاء اللہ۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے